محترم شیخ الوظائف صاحب السلام علیکم!اللہ تعالیٰ آپ کو صحت و تندرستی‘عافیت اور برکت عطا فرمائے‘ آپ کی نسلوں میں سدا آسانیاں اور خوشحالیاں عطا فرمائے۔آپ کی وجہ سے ہمیں صحت‘عزت اور برکت ملی ہے۔
میری چھوٹی بیٹی جس کی عمر تقریباً تین سال ہے‘ماہ رمضان میں وہ قبض کے مرض کا شکار ہو گئی۔تھوڑے ہی دنوں میں اس کا مرض اس قدر بڑھ گیا کہ پاخانہ آنا بھی بند ہو گیا ‘ شدید تکلیف کا سامنا تھا۔ڈاکٹر کو معائنہ کروایا‘انہوں نے ٹیسٹ وغیرہ کرنے کے لئے کہا ‘رپورٹس دیکھنے کے بعد انہوں نے کچھ ادویات لکھ کر دیں۔ڈاکٹر کے مشورہ پر ان ادویات کا استعمال کروانا شروع کر دیا مگر ان ادویات کے استعمال سے بچی کو تین دن بعد پاخانہ آتا اور اس میں بھی خون ہوتا۔بچی کی تکلیف اور مرض کی کیفیت دیکھی نہ جارہی تھی۔ تمام تر علاج معالجے کرواکر دیکھ لئے مگر شفاء نہ مل سکی۔ اللہ تعالیٰ سے رو رو کر اپنی بیٹی کی صحت یابی کے لئے دعا کرنا شروع کردی۔ ایک دن آپ کی شب جمعہ کی روحانی محفل سن رہی تھی‘ اللہ تعالیٰ نے میرے دل کی کیفیت کو آپ پر کھول دیا۔آپ نے سخت سے سخت قبض سے نجات پانے کے لئے ایک طبی ٹوٹکہ بتایا۔میں نے وہ ٹوٹکہ بنا کر بیٹی کو استعمال کروانا شروع کر دیا۔چند دن کے استعمال سے قبض ٹوٹنا شروع ہو گئی۔پھر میں نے تمام ادویات کو چھوڑ کر آپ کا بتایا ہوا ٹوٹکہ باقاعدگی سے استعمال کروانا شروع کر دیا جس کے نہایت حیرت انگیز نتائج ملے۔اللہ تعالیٰ کے فضل و کرم سے بیٹی کی قبض بالکل ختم ہو گئی‘خون آنا بھی ختم اور تکلیف سے بھی چھٹکارا مل گیا۔وہ ٹوٹکہ درج ذیل ہے۔
تین عدد انجیر کے دانے پانی میں بھگو کررات کو رکھیں‘ صبح اٹھ کر پانی سے انجیر نکال کر کھالیں اور اوپر سے ایک کپ دودھ پی لیں۔آپ کیلئے سدا دعا گو رہوں گی کیونکہ اس ٹوٹکہ کی وجہ سے میری بیٹی جو تکلیف سے بری طرح نڈھال ہو چکی تھی اسے راحت ملی۔ورنہ لوگوں کے مشورے اور باتیں سن سن کر پریشان ہو چکی تھی‘ کوئی کہتا کہ آنتوں کا آپریشن ہو گا اور کوئی کچھ بتاتا‘بچی کے مرض کی وجہ سے روتی رہتی تھی مگر آپ کے اس آسان ٹوٹکہ کی وجہ سے اللہ تعالیٰ نے کامل صحت عطا فرما دی۔